AMEA-nın Nəsimi adına Dilçilik İnstitutunda ümummilli lider Heydər Əliyevin Anım Gününə həsr olunmuş tədbir keçirilib.

11 dekabrda AMEA-nın Nəsimi adına Dilçilik İnstitutunda ümummilli lider Heydər Əliyevin Anım Gününə həsr olunmuş “Heydər Əliyev və Azərbaycan dili” mövzusunda tədbir keçirilib.

Öncə Ümummilli Lider Heydər Əliyevin əziz xatirəsi bir dəqiqəlik sükutla yad olunub.

AMEA Nəsimi adına Dilçilik İnstitutunun direktoru professor Nadir Məmmədli tədbiri açaraq bildirib ki, Ulu Öndər Heydər Əliyevin apardığı dil siyasəti, dilimizin inkişafı yönündə göstərdiyi tarixi xidmətləri ilə əsl məktəb yaratdığını diqqətə çatdırıb. O, dahi lider Heydər Əliyevin keçən əsrin 70-80-ci illərində yeritdiyi dil siyasətinin Azərbaycanda milli özünəqayıdış, milli özünüdərk və milli azadlıq ruhunu yüksəltdiyini vurğulayaraq, müstəqillik illərində ölkə rəhbərinin təşəbbüsü və fəal iştirakı ilə 1995-ci il noyabrın 12-də qəbul olunan Konstitusiyada Azərbaycan dilinin dövlət dili kimi təsbit olunduğunu bildirib.

Direktor qeyd edib ki, Ulu Öndərin imzaladığı “Dövlət dilinin tətbiqi işinin təkmilləşdirilməsi haqqında” 2001-ci il 18 iyun tarixli Fərman, “Azərbaycan Respublikasında dövlət dili haqqında” Qanun ölkəmizdə dil siyasəti və dil quruculuğunun mükəmməl konsepsiyasını, onun uzunmüddətli strategiyasını və aydın proqramını verən tarixi qanunvericilik aktlarıdır. Onun sözlərinə görə, bu sənədlərin hazırlanmasında görkəmli dövlət xadimi Heydər Əliyevin yüksək intellekti, zəngin dövlətçilik təcrübəsi, yenilməz məntiqi, vətəndaşlıq qeyrəti, ana dilinə misilsiz məhəbbəti mühüm rol oynayıb.

Professor Nadir Məmmədli qloballaşma dövründə Azərbaycan dilinin saflığının qorunmasının vacibliyinə də toxunub.

Nadir Məmmədli həmçinin qeyd edib ki, ümummilli lider Heydər Əliyevin davamçısı Prezident İlham Əliyev xalqının səadəti, dövlətimizin müdafiə qüdrətinin yüksəlməsi, dövlətçiliyin möhkəmlənməsi, torpaqlarımızın işğaldan azad edilməsi uğrunda siyasi, hərbi lider kimi dincəlmədən sözün əsl mənasında mübarizə apardı.

Tədbirdə icraçı direktor dosent Baba Məhərrəmli “Heydər Əliyev İli” ərzində institutda keçirilən tədbirlər, konfranslar və yeni nəşrlər barədə məlumat verib.

Professor İsmayıl Məmmədli Ulu Öndər Heydər Əliyevin hakimiyyəti dövründə Azərbaycan televiziyasında “Dil xalqın milli sərvətidir”, “Azərbaycan dili” verilişlərinin əhəmiyyətini, hələ 1970-ci ildə Bakı Dövlət Universitetinin 50 illik yubileyində Ulu Öndərin Azərbaycan dilində çıxış etməsinin o dövr üçün mühüm hadisə hesab olunduğunu vurğulayıb.

Tədbirdə professorlar Sevil Mehdiyeva, Sayalı Sadıqova, filologiya elmləri doktoru Aynel Məşədiyeva, dosent Füzuli Mustafayev ümummilli liderin Azərbaycan dili ilə bağlı sərəncam və fərmanlarının əhəmiyyətindən danışıb. Vurğulayıb ki, bunlar Azərbaycan dilinin dövlət dili kimi işlədilməsinə, onun tətbiqi, qorunması və inkişaf etdirilməsinə əsaslı zəmin yaradıb.