Dilçilik İnstitutunun Gənc Alim və Mütəxəssislər Şurasının üzvlərinin “Heydər Əliyevin dövlətçilik idealları və müasir gənclik” mövzusunda respublika konfransında aktiv iştirakı

22 iyun 2023-cü il tarixində Azərbaycan Milli Elmlər Akademiyasının Əsas binasında Ümummilli Lider Heydər Əliyevin 100 illik yubileyinə həsr olunmuş “Heydər Əliyevin dövlətçilik idealları və müasir gənclik” mövzusunda respublika konfransının açılışı baş tutmuşdur. 4 gün davam edəcək konfrans Azərbaycan Milli Elmlər Akademiyası, AMEA-nın Gəncə Bölməsi və AMEA-nın Gənc Alim və Mütəxəssislər Şurasının birgə təşkilatçılığı ilə keçirilir.

Açılışıda sözə başlayan AMEA prezidenti, akademik İsa Həbibbəyli öz çıxışı əsnasında həm də AMEA-nın Gənc Alim və Mütəxəssislər Şurasının fəaliyyətinə toxunmuş, şuranın xətti ilə gənclərin xarici elm mərkəzlərinə təcrübə keçməyə göndərildiklərini, “Gənc tədqiqatçı” jurnalının dövriliyinin il ərzində 4-ə yüksəldildiyini (bir buraxışı ingiliscə olmaqla) diqqətə çatdırıb, konfransın işinə uğurlar arzulayıb.

Daha sonra AMEA-nın Gənc Alim və Mütəxəssislər Şurasının sədri, kimya üzrə fəlsəfə doktoru Elmir Babayev “Ulu Öndər Heydər Əliyevin gənclər siyasətinin konseptual əsasları və hədəfləri” mövzusunda məruzə ilə çıxış etmiş və bildirmişdir ki, müasir dövrdə gənc nəslin potensial imkanlarının açılması, təzahür etməsi, ictimai önəminin ifadəsi və ümumiyyətlə gənclərin bir şəxsiyyət kimi formalaşmasında elmin və təhsilin yeri böyükdür.

Açılışın yekununda bir sıra institutların Gənc Alim və Mütəxəssislər şuralarının sədrlərinə, o cümlədən Dilçilik İnstitutu GAMŞ sədri fil.ü.f.d., dos. Günel Orucovaya gənclərlə iş üzrə fəaliyyətinə və konfransın təşkili məsələlərində xidmətlərinə görə təşəkkürnamə təqdim olunmuşdur. Qeyd edək ki, konfransın açılış tədbirində Dilçilik İnstitutunun “Hind-Avropa şöbəsi”nin böyük elmi işçiləri Bəturə Əliyeva və Sevinc Şükürlü, “Azərbaycan dialektologiyası” şöbəsinin elmi işçisi Aynur Saydova, “Kompüter dilçiliyi” şöbəsinin böyük elmi işçisi Maya Heydərova və baş laborantı Lalə Muradova, “Toponimika” şöbəsinin operatoru Aysel Mövlamova və kiçik elmi işçisi Ayşən İsmayıllı iştirak etmiş, “Kompüter dilçiliyi” şöbəsinin elmi işçisi Vəlizadə Nigar və “Türk dilləri” şöbəsinin elmi işçisi Arzu İsgəndərzadə isə təşkilati məsələlərdə aktiv fəaliyyətlərinə görə təşəkkürnamə almışlar.

Açılışın ardından konfransın məruzələri ayrıca plenar bölmələrdə təqdim olunmuş, humanitar bölmədə Günel Orucovanın sədrliyi ilə 26 məruzə dinlənilmişdir. Bu iclasda həm də Dilçilik İnstitutunun “Kompüter dilçiliyi” şöbəsinin böyük elmi işçisi Mahmudova Rəna “Nitq, kommunikasiya prosesində mədəniyyətimizin və şüurun tərkib hissəsidir” adlı məruzə ilə çıxış etmiş və təşəkkürnamə almışdır.