16 noyabrda Azərbaycan Milli Elmlər Akademiyasının Nəsimi adına Dilçilik
İnstitutunun Elmi şurasında Türk Dil Qurumunun sabiq sədri, Hacettepe
Universitetinin professoru Şükrü Haluk Akalınla görüş keçirilib.
Hacettepe Universitetinin professoru Şükrü Haluk Akalın Azərbaycan Milli
Elmlər Akademiyasının Nəsimi adına Dilçilik İnstitutunun fəxri doktoru seçilib.
İclasda çıxış edən AMEA Nəsimi adına Dilçilik İnstitutunun baş direktoru
professor Nadir Məmmədli Azərbaycan-Türkiyə münasibətlərinin daim yüksələn
xətt üzrə inkişaf etdiyini nəzərə çatdırıb. O, Şükrü Haluku Akalının müasir
türkologiyanın əsas simalarından biri olduğunu vurğulayıb. Bildirib ki, Şükrü
Haluku Akalın Azərbaycan dilinə, dilçilik elminə sevgisi olan ziyalılardandır. Son
illərdə onunla Nəsimi adına Dilçilik İnstitutu arasında dostluq münasibəti
formalaşıb ki, bu da Türkiyənin dilçilik mühiti ilə əlaqə deməkdir.
Sonra professor Nadir Məmmədli Fəxri doktor diplomunu Şükrü Haluk Akalına
təqdim edib.
Dilçilik İnstitutunun fəxri doktoru adına layiq görülməsindən məmnunluğunu ifadə
edən Şükrü Haluk Akalın bundan sonra da Türkiyə ilə Azərbaycan arasında elmi
əlaqələrin gücləndirilməsinə çalışacağını deyib. Şükrü Haluk bildirib ki,
Azərbaycanı vətəni olaraq görür . 25 il Adana Universitetində, 16 il Hacettepe
Universitetində Azərbaycan dilini tədris edib. Alim vurğulayıb ki , bu adın
verilməsi onun üçün böyük əhəmiyyət kəsb edir.
Sonra Nəsimi adına Dilçilik İnstitutunun Elmi şurasının qərarı ilə çap olunmuş
“"Azərbaycan dilinin Qarabağ və Şərqi Zəngəzur dialektoloji atlası" Şükrü Haluk
Akalına təqdim olunub.
İclasda çıxış edənlər professorlar Sayalı Sadıqova, İlami Cəfərsoy, İsmayıl
Məmmədli , institutun elmi katibi dosent Aynel Məşədiyeva , Türk dilləri
şöbəsinin aparıcı elmi işçisi Qətibə Quliyeva Azərbaycan-Türkiyə elmi və ədəbi
əməkdaşlığından danışıblar. Şükrü Haluk Akalına sevgi və sayğılarını bildiiblər.
Qeyd ediblər ki, bizim bütün əməkdaşlığın arxasında Azərbaycan- Türkiyə
münasibətləri, qardaşlıq- dostluq əlaqələri dayanır.
Şükrü Haluk Akalın ona göstərilən diqqətə görə Dilçilik İnstitutunun rəhbərliyinə
və Elmi şuraya minnətdarlığını bildirib.
Şrifti böyüt:
Çap et