Fəlsəfə və elmlər doktorluğu hazırlığı üzrə doktorant və dissertanturaya sənəd verən gənclərlə görüş keçirilib

Azərbaycan Milli Elmlər Akademiyasının (AMEA) doktorantura və dissertanturasına sənəd qəbulu 2022-ci il mayın 10-u başa çatıb.

AMEA Nəsimi adına Dilçilik İnstitutunda fəlsəfə və elmlər doktorluğu hazırlığı üzrə doktorantura və dissertanturaya sənəd verən gənclərlə görüş keçirilib.

Elmi müəssisənin baş direktoru filologiya elmləri doktoru, professor Nadir Məmmədli tədbirdə təhsilin hər pilləsində, o cümlədən doktorantura və dissertanturada bütün proseslərin tamamilə şəffaf aparıldığını qeyd edib. Professor gənclərə elmi işlərlə bağlı mövzu seçimi, işlərin aparılması, elmi tədqiqatlarda məsuliyyətli olmağı tövsiyə edib.

Müraciətlərinə müəssisə tərəfindən müsbət rəy verilən şəxslər ingilis dili imtahanlarında iştirak etmək imkanı qazanacaqlar.

Qeyd edək ki, bu il Dilçilik İnstitutunun Təhsil şöbəsinə doktorantura və dissertantura hazırlığı üzrə 30 nəfərin sənədi qəbul olub. Onlardan 17 nəfər fəlsəfə doktoru hazırlığı üzrə doktoranturaya, 6 nəfər dissertanturaya, 2 nəfər elmlər doktoru hazırlığı üzrə doktoranturaya, 6 nəfər dissertanturaya sənəd verib.