Professor Məsud Mahmudova Türk Dünyası Araşdırmaları Beynəlxalq Elmlər Akademiyasının üzvlük diplomu təqdim olunub.

AMEA Nəsimi adına Dilçilik İnstitutunun Kompüter dilçiliyi şöbəsinin müdiri, filologiya elmləri doktoru, professor Məsud Mahmudov Türk Dünyası Araşdırmaları Beynəlxalq Elmlər Akademiyasının həqiqi üzvü seçilib və qurumun “Beynəlxalq qızıl ulduz” medalı ilə təltif olunub. Dilçi-alimə üzvlük diplomunu və medalı Türk Dünyası Araşdırmaları Beynəlxalq Elmlər Akademiyasının Azərbaycan üzrə təmsilçisi, görkəmli alim, şair, texnika elmləri doktoru, professor Elçin İsgəndərzadə təqdim edib. Elçin İsgəndərzadə qeyd edib ki, dilçi- alim bu mükafata türk dünyası elmi və təhsili sahəsində üstün xidmətlərinə görə layiq görülüb.

Professor Məsud Mahmudov bu mükafatı Azərbaycan elm adamlarının səmərəli fəaliyyətinə verilən böyük qiymət kimi səciyyələndirib və əməkdaşı olduğu AMEA Nəsimi adına Dilçilik İnstitutunun kollektivi adından Türk Dünyası Araşdırmaları Beynəlxalq Elmlər Akademiyasına dərin təşəkkürünü bildirib.

Qeyd etmək lazımdır ki, professor Məsud Mahmudov formal təhlil sistemlərinin qurulmasının nəzəri və təcrübi problemləri, maşın tərcüməsi, statistik leksikoqrafiya sahəsində respublikamızda və onun hüdudlarından kənarda tanınmış mütəxəssisdir. “Kitabi-Dədə Qorqud”un və Məhəmməd Füzulinin əsərlərinin linqvostatistik cəhətdən öyrənilməsi sahəsində dəyərli araşdırmaların müəllifidir. Dilçi – alimin “Система автоматической переработки тюркского текста на лексико-морфологическом уровне”, “Mətnin formal təhlili sistemi”, ““Kompüter dilçiliyi”, “ Türk dillərinin milli korpusları” kimi əsərləri informatika, dil nəzəriyyəsi, maşın tərcüməsi və süni intellekt problemləri ilə məşğul olan mütəxəssislər tərəfindən yüksək qiymətləndirilmiş, elmi ictimaiyyət tərəfindən rəğbətlə qarşılanmışdır.