“Humanitar elmdə Azərbaycan qadını” mövzusunda ictimai-elmi seminar keçirilib

Şrifti böyüt:
Çap et

Fevralın 15-də Azərbaycan Milli Elmlər Akademiyasının Nəsimi adına Dilçilik İnstitutunun Qadınlar Şurasının Folklor İnstitutu Qadınlar Şurası ilə birlikdə təşkil etdiyi “Humanitar elmdə Azərbaycan qadını” adlı ictimai-elmi seminar keçirilib.

Tədbiri giriş sözü ilə açan Dilçilik İnstitutunun Baş direktoru filologiya elmləri doktoru, professor Nadir Məmmədli Azərbaycan qadının cəmiyyətdə rolunu qeyd etmiş,ali qadınların Azərbaycan elmindəki uğurlarından söz açmışdır. Daha sonra AMEA Dilçilik İnstitutu Qadınlar Şurasının sədri fil.ü.f.d, dos. Şəbnəm Həsənli- Qəribova 11 fevral “Beynəlxalq Qadınlar və Qızların Elmdə İştirakı Günü” haqqında məlumat vermişdir.

Tədbirdə AMEA Folklor İnstitutu Folklor və yazılı ədəbiyyat şöbəsinin müdiri fil.e.d, dos. Leyla Məmmədova “ Qarabağın qadın şairləri”, AMEA Dilçilik İnstitutu Terminologiya şöbəsinin aparıcı elmi işçisi, fil.ü.f.d., dos. Vəfa Abdullayeva- Nəbiyeva “Azərbaycanın maarifçi qadınları”, AMEA Folklor İnstitutu “Mifologiya” şöbəsinin aparıcı elmi işçisi, fil.ü.f.d. İlhamə Qəsəbova “İlkə imza atmış Azərbaycanlı qadınlar”, AMEA Dilçilik İnstitutu “Türk dilləri” şöbəsinin böyük elmi işçisi Dilbər Camali “İlk qadın dilçi alimlər” adlı məruzə ilə çıxış ediblər.

Məruzəçilər qeyd etdilər ki, XIX əsrin sonlarından başlayan maarifçilik hərəkatında Azərbaycan qadını da öz üzərinə düşən vəzifələri doğru dərk edərək maarifçilik hərəkatını genişləndirmək üçün böyük xidmətlər görmüşlər. Bu dövrdə Azərbaycanın tərəqqipərvər qadınları - Məryəm xanım Bayraməlibəyova Lənkəranda, Gövhər Şövqiyyə Şamaxıda, Nazlı Tahirova Naxçıvanda, Maral Nəbizadə Şəkidə, Bülbül Kazımova Gədəbəydə, T.Ağayeva, Yaqut Ağayeva, Fərdmuş Paşayeva Gəncədə, Səidə Şeyxzadə, Sara Vəzirova, Hənifə Məlikova,Qərib Soltan, Zərri Şahtaxtinskaya, Rəhilə Hacıbababəyova və başqaları Bakıda xalq maarifinin inkişafına çalışmışlar. Azərbaycan qadınlar müxtəlif elm sahələrində ilkə imza ataraq elmi cəmiyyətdə böyük uğurlar əldə etmişlər.