Azərbaycan Milli Elmlər Akademiyası

                          Nəsimi  adına
                        DİLÇİLİK   İNSTİTUTU



 


   
 
   
 
  RƏHBƏRLİK
   
Elmi katib
 
  HAQQIMIZDA
   
İnstitutun tarixi
Elmi şura
   
ŞÖBƏLƏR
   
Azərbaycan dilinin dialektologiyası şöbəsi
İctimaiyyətlə əlaqələr şöbəsi
Təhsil şöbəsi
 
 
DİGƏR
   
Qaynar xətt
Elmi kitabxana
Yeni nəşrlər
Elanlar
Gənc Alim və Mütəxəssislər Şurası
İnnovasiya
Konfranslar
Video
Mətbuat yazıları
Saytın xəritəsi
   
LİNKLƏR
   
 
 
 
   
 
SAYĞAC
 
free counters
05.04.2019

“Həmid Araslı və “Kitabi-Dədə Qorqud” dastanı” mövzusunda elmi sessiya keçirilib

Aprelin 5-də Azərbaycan Milli Elmlər Akademiyasının (AMEA) Nəsimi adına Dilçilik İnstitutunda görkəmli ədəbiyyatşünas, Əməkdar elm xadimi, akademik Həmid Araslının anadan olmasının 110 illiyinə həsr edilən “Həmid Araslı və “Kitabi-Dədə Qorqud” dastanı” mövzusunda elmi sessiya keçirilib.

AZƏRTAC xəbər verir ki, tədbirdə çıxış edən institutun direktoru, akademik Möhsün Nağısoylu Prezident İlham Əliyevin akademik Həmid Araslının 110 illiyinin qeyd edilməsi haqqında Sərəncamını xatırladıb. Qeyd edib ki, Sərəncama əsasən ölkəmizdə və AMEA-nın digər elmi müəssisələrində yubileylə bağlı müxtəlif tədbirlər keçirilir.

M.Nağısoylu deyib: “H.Araslının Azərbaycan ədəbiyyatşünaslığının, dilimizin, ədəbiyyat tariximizin, folklorşünaslığımızın inkişafında misilsiz xidmətləri olub. O, Azərbaycan ədəbiyyatşünaslığının korifeyi, zirvəsidir. Qədim və orta əsrlər Azərbaycan ədəbiyyatı sahəsində xüsusi mövqeyə malik nüfuzlu mütəxəssis və dərin erudisiyalı alim kimi geniş şöhrət qazanan H.Araslı çoxsaylı araşdırmaları ilə respublikada ədəbiyyatşünaslığın inkişafına dəyərli töhfələr verib. Görkəmli akademik xalqımızın ölməz abidəsi olan “Kitabi-Dədə Qorqud”un Azərbaycanda ilk tədqiqatçısı kimi tanınıb. O, 1939-cu ildə “Kitabi-Dədə Qorqud”u nəşr etdirməklə ədəbiyyatımıza, mədəniyyətimizə böyük xidmət göstərib. Həmid Araslı 1968-ci ildə Özbəkistanın, 1979-cu ildə isə Azərbaycanın Əməkdar elm xadimi adına layiq görülüb”.

Diqqətə çatdırılıb ki, alim digər Şərq xalqlarının ədəbi irsinə də böyük maraq göstərib. O, Firdovsi, Cami və Hafizin, xüsusilə böyük özbək şairi Əlişir Nəvainin irsini tədqiq edib, orta əsrlər ədəbiyyatımızın əlaqələrinə dair ilkin araşdırmaların müəllifi kimi məşhurlaşıb.

Sessiyada professor Sevil Mehdiyevanın “Həmid Araslı və Azərbaycan ədəbi dilinin tarixi”, filologiya üzrə elmlər doktoru Paşa Kərimovun “Həmid Araslı yazılı abidələrimizin görkəmli tədqiqatçısı kimi” mövzularında məruzələri dinlənilib. Məruzəçilər H.Araslını görkəmli ədəbiyyatşünas və mətnşünas alim kimi səciyyələndirib, onun bütün əsərlərinin gənc ədəbiyyatşünaslar üçün etibarlı mənbə olduğunu qeyd ediblər.

Bildirilib ki, H.Araslı XX əsr Azərbaycanının elmi və ədəbi-ictimai həyatında aparıcı mövqeyə malik şəxsiyyətlərdən biri idi. O, həm tədqiqatlarında, həm də dərsliklərində klassik şeirimizin incəliklərinin elmi-nəzəri şərhinə xüsusi diqqət yetirib, nəsilləri milli türkçülük ruhunda tərbiyələndirmək, soykökümüzlə bağlı məsələləri doğru-düzgün şərh etmək üçün əlindən gələni əsirgəməyib. Alim məhsuldar elmi yaradıcılığını pedaqoji fəaliyyətlə uzun illər uğurlu şəkildə əlaqələndirib, ölkənin mədəni-ictimai həyatında da yaxından iştirak edib. AMEA sistemində onun fəaliyyəti bir çox qurumları əhatə edir.

Professor İsmayıl Məmmədli, filologiya üzrə elmlər doktorları Nəriman Seyidəliyev, İlhami Cəfərsoy və digər çıxış edənlər Azərbaycan ədəbiyyatı tarixinin sistemləşdirilərək elmi istiqamətdə öyrənilməsində ədəbiyyatşünas alimin xidmətlərindən söz açıblar.

Görkəmli alimin qızı, AMEA-nın müxbir üzvü Nüşabə Araslı atasının xatirəsinə göstərilən hörmət və ehtirama görə ölkə rəhbərinə minnətdarlığını bildirib. O, Prezident İlham Əliyevin H.Araslının 110 illiyinin qeyd edilməsi haqqında 2019-cu il 11 fevral tarixli Sərəncamını xüsusi qeyd edib. Vurğulayıb ki, bu Sərəncam dövlətimiz tərəfindən ədəbiyyatşünaslığımızın inkişafına göstərilən böyük diqqət və qayğıya bariz nümunədir.

SAYTDA AXTAR

© Bütün hüquqlar qorunur. Yazılardan istifadə edərkən sayta istinad edilməlidir.
Azərbaycan Milli Elmlər Akademiyası Nəsimi adına Dilçilik İnstitutu. 2012-2018.